ಹವ್ಯಕತನವು ಬ್ರಾಹ್ಮಣ್ಯವೆಂಬ ಶ್ರೇಷ್ಠ ಸಂಸ್ಕೃತಿಯ ಹಿನ್ನೆಲೆಯುಳ್ಳದ್ದಾಗಿದೆ. ಭದ್ರವೂ, ದಿವ್ಯವೂ ಆದ ಸನಾತನ ವೈದಿಕ ಸಂಸ್ಕೃತಿಯೇ ಬ್ರಾಹ್ಮಣ್ಯದ ಜೀವಾಳ. ಆದ್ದರಿಂದ ಬ್ರಾಹ್ಮಣ್ಯದ ರಕ್ಷಣೆಯ ಮೂಲಕವೇ ಹವ್ಯಕತನವನ್ನು ಉಳಿಸಿಕೊಂಡು ಹೋಗಬೇಕಾದ ಮಹತ್ತರ ಜವಾಬ್ದಾರಿಯು ನಮ್ಮದಾಗಿದೆ. ’ಬ್ರಾಹ್ಮಣಸ್ಯ ಹಿ ದೇಹೋಯಂ ಕ್ಷುದ್ರ ಕಾಮಾಯ ನೇಷ್ಯತೇ| ಕೃಚ್ಛ್ರಾಯ ತಪಸೇ ಚೇಹ ಪ್ರೇತ್ಯಾನಂತಸುಖಾಯ ಚ|| ಬ್ರಾಹ್ಮಣ್ಯವೆಂಬುದು ಕೇವಲ ಒಂದು ಜಾತಿ, ಮತ, ಪಂಥಕ್ಕಷ್ಟೇ ಸೀಮಿತ ವಿಷಯವಲ್ಲ. ಜೀವನದ ಪರಮೋದ್ದೇಶವನ್ನು ಸಾಧಿಸಿಕೊಳ್ಳುವುದಕ್ಕಾಗಿ ಭಗವಂತನು ಅನುಗ್ರಹಿಸಿದ ಅತ್ಯಂತ ದುರ್ಲಭವಾದ ಅವಕಾಶವಿದು. ಭಾರತೀಯ ಪರಂಪರೆಯ ಸುದೀರ್ಘ ಇತಿಹಾಸವನ್ನು ಅವಲೋಕಿಸಿದಾಗ ಬ್ರಾಹ್ಮಣ್ಯವು ಸುರಕ್ಷಿತವಾಗಿರುವಾಗ ರಾಷ್ಟ್ರದಲ್ಲಿ ಸುಭಿಕ್ಷ-ಸಮೃದ್ಧಿ-ಸ್ವಾಸ್ಥ್ಯವು ಉಂಟಾಗಿರುವುದು ಕಂಡುಬರುತ್ತದೆ. ಬ್ರಾಹ್ಮಣ್ಯಕ್ಕೆ ಧಕ್ಕೆಯುಂಟಾದಾಗ ರಾಷ್ಟ್ರಕ್ಕೆ ಆಪತ್ತುಗಳು ಬಂದೊದಗಿರುವುದೂ ಕಂಡುಬರುತ್ತದೆ. ಈ ಹಿನ್ನೆಲೆಯಲ್ಲಿ ಜಗತ್ತಿನ ಒಳಿತಿಗೆ ಕಾರಣವಾದ ಧರ್ಮವು ಬ್ರಾಹ್ಮಣ್ಯದ ಸತ್ವವೆಂದು ತಿಳಿದುಬರುತ್ತದೆ. ಆಧುನಿಕತೆಯ ವ್ಯಾಮೋಹ, ಸ್ವಧರ್ಮದ ಕಡೆಗಣನೆ, ಪರಧರ್ಮದ ಆಕರ್ಷಣೆ ಇವೇ ಮೊದಲಾದ ಪ್ರಮಾದಗಳಿಂದ ಉಂಟಾದ-ಉಂಟಾಗುತ್ತಿರುವ ಅನೇಕ ಆಪತ್ತು-ವಿಪತ್ತುಗಳನ್ನು ಎದುರಿಸಬೇಕಾದ ಕಾಲಘಟ್ಟದಲ್ಲಿ ನಾವಿದ್ದೇವೆ. ಹವ್ಯಕರ ಸಂಪ್ರದಾಯ-ಸಂಸ್ಕೃತಿಗಳನ್ನು ಚೆನ್ನಾಗಿ ಅರಿತು, ಆ ಬಗ್ಗೆ ಶ್ರದ್ಧೆ, ಆದರಗಳನ್ನು ಉಳಿಸಿ-ಬೆಳೆಸಿಕೊಳ್ಳುವುದರ ಜೊತೆಯಲ್ಲಿ ಮುಂದಿನ ತಲೆಮಾರಿಗೆ ಅದನ್ನು ವ್ಯವಸ್ಥಿತವಾಗಿ ತಲುಪಿಸುವ ಗುರುತರ ಜವಾಬ್ದಾರಿಯನ್ನು ಸಂಘಟಿತ ಪ್ರಯತ್ನದ ಮೂಲಕ ನಿರ್ವಹಿಸಬೇಕಾಗಿದೆ. ಈ ದಿಸೆಯಲ್ಲಿ ’ಗೋಕರ್ಣಮಂಡಲ’ವೆಂಬ ಹವ್ಯಕರ ಸಂಘಟನೆಯು ಸದಾ ಕ್ರಿಯಾಶೀಲವಾಗಿರಲೆಂದು ಆಶಿಸುತ್ತೇವೆ.

ಶ್ರೀಮದ್‌ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳು

ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನ